Ապօրինի թմրաշրջանառության վնասակարությունը. ոստիկանության թեմատիկ անդրադարձը

Տարատեսակ հանցավոր արարքներ, ինքնավնասում, հազարավոր խեղված ճակատագրեր… Այս շղթան կարելի է անվերջ թվարկել: Գաղտնիք չէ, որ այս ամենի մի մասը թմրամիջոցների օգտագործման հետևանքով է: Մարդիկ կորցնում են սթափությունը, իսկ ուշքի գալուց հետո հասկանում, որ տեղի է ունեցել անդառնալին:
Ապօրինի թմրաշրջանառությունը և թմրանյութերի օգտագործումը բնակչության առողջության դեմ ուղղված հանցագործություններից է:
Ապօրինի թմրաշրջանառության իրավական հետևանքների մասին բազմիցս ենք խոսել, ներկայացրել ոստիկանության բացահայտումները, պատմել կանխարգելիչ միջոցառումների մասին: Այսօր խոսելու ենք դրա վնասակարության մասին:
Թմրամիջոցների ապօրինի շրջանառությունը արհավիրք է դարձել ողջ աշխարհում, և ցավալի է, որ տարեցտարի ընդլայնվում են թմրանյութերի օգտագործման և տարածման սահմանները: Ըստ համաշխարհային տարեկան հաշվետվության` աշխարհի բնակչության 230-300 միլիոն մարդ իր կյանքում գոնե մեկ անգամ օգտագործել է թմրամիջոց: Նրանցից շատերը, տրվելով րոպեական հաճույքին, շարունակում են կործանում տանող ճանապարհը:
Թմրամոլությունը հանգեցնում է օրգանիզմի կենսագործունե¬ության կոպիտ խանգարման, կախվածության և սոցիալական անկման՝ դեգրադացիայի: Ցավերից, տհաճ զգացողություններից, անքնությունից և այլ տանջալի վիճակներից խուսափելու նպատակով որոշ մարդիկ, հատկապես չափից ավելի տպավորվող, խռովահույզ, կասկածամիտ և այլ նևրոտիկ ապրումներ ունեցողներ, ինքնակամ, չգիտակցելով սպառնացող վտանգը, սկսում են թմրամիջոց գործածել, իսկ մեկ անգամ փորձողներն ավելացնում են չափաբաժինն ու օգտագործման հաճախականությունը։
Ոստիկանությունը կրկին հորդորում ու պահանջում է զերծ մնալ թմրանյութերի օգտագործումից և դրանք շրջանառելուց: Գնահատե՛ք ազատության մեջ ապրելու, առողջ և ապահով կյանք ունենալու ձեր իրավունքը: