Ծեծկռտուք և կրակոցներ` ավտոմեքենան արագ վարելու պատճառով (ՏԵՍԱՆՅՈՒԹ)

Հունիսի 20-ին ոստիկանության Արմավիրի բաժնի քրեական հետախույզները Արմավիրի մարզի Նորավան գյուղում էին: Ոստիկանության Երեւան քաղաքի ՕԿԿ-ից ահազանգ էր ստացվել, եւ շտապ գյուղ էին հասել: Նորավանում վիճաբանություն էր տեղի ունեցել, որը վերածվել էր ծեծկռտուքի:

Տեղում ձեռնարկված միջոցառումների արդյունքում իրավապահներին հաջողվեց արագ ճշտել դեպքի հանգամանքները եւ ծեծկռտուքի մասնակիցների ինքնությունը: Լսեցին տուժողին եւ պարզեցին նաեւ վիճաբանության պատճառը:

Դեպքը տեղի էր ունեցել գյուղի փողոցներից մեկում, նույն օրը, ժամը մեկի սահմաններում: Ըստ նախնական տեղեկությունների` ծեծկռտուքին մասնակցել էին մի կողմից նորավանցիներ` հայր եւ որդի, մյուս կողմից` նույն գյուղի բնակիչ Խաչիկն ու ընկերը` Արտյոմը, որն էլ, ըստ տեղեկությունների, կրակողն էր:

Օպերատիվ-բացատրական գործողությունների արդյունքում շուտով ինքնակամ ոստիկանություն ներկայացավ եւ խոստովանական բացատրություն տվեց օդամղիչ ատրճանակով երեք անգամ օդ կրակած, Արմավիր քաղաքի բնակիչ, 27-ամյա Արտյոմ Կոստանյանը:

Պարզվեց նաեւ վիճաբանության պատճառը: Նախ վեճի էին բռնվել նորավանցիները: Խաչիկ Կարապետյանը համագյուղացիների հետ լեզվակռվի մեջ էր մտել մեքենան անկանոն եւ արագ քշելու պատճառով: Կարճատեւ վեճից հետո հեռացել էր, իսկ դիտողությունն  իր ինքնասիրությանն ուղղված վիրավորանք էր համարել եւ ընկերոջ հետ վերադարձել ու, այսպես ասած` «պատիվ էր պահանջել»: Վեճը բորբոքվել էր, հետո ծեծել էին իրար: Այդ ընթացքում Արտյոմ Կոստանյանը հանել էր ատրճանակն ու երեք անգամ օդ կրակել: Իր ասելով` ցանկացել էր վերջ դնել ծեծկռտուքին:

Փաստի առթիվ ոստիկանության Արմավիրի քննչական բաժնում հարուցվել է քրեական գործ` քրեական օրենսգրքի 258-րդ հոդվածի 4-րդ մասի հատկանիշներով:

Արտյոմ Կոստանյանը ստորագրությամբ բաց է թողնվել: Օդամղիչ ատրճանակն առգրավված է:

Ձեռնարկվում են միջոցառումներ Խաչիկ Կարապետյանին հայտնաբերելու ուղղությամբ:

Նախաքննությունը շարունակվում է: