Համայնքային ոստիկանությունը հիմնված է ոստիկանության և համայնքի սերտ համագործակցության վրա
Մայիսի 30-ին ՀՀ ոստիկանության պետի տեղակալ, ոստիկանության գեներալ-մայոր Արթուր Օսիկյանն ընդունեց ԵԱՀԿ երևանյան գրասենյակի պատվիրակությանը, որը գլխավորում էր ռազմաքաղաքական ծրագրերի ղեկավար Լիլիան Շալառուն:
Հանդիպման ընթացքում քննարկվեցին հունիսի 1-ից Երևանում ներդրվող համայնքային ոստիկանության նոր մոդելին վերաբերող հարցեր:
Արթուր Օսիկյանը նշեց, որ համայնքային ոստիկանությունը ոստիկանական գործունեության յուրահատուկ ուղղություն է, որը հիմնված է ոստիկանության և համայնքի սերտ համագործակցության վրա և նպատակ ունի արդյունավետորեն լուծելու համայնքի խնդիրներն ու նրան մատուցել որակյալ ոստիկանական ծառայություն:
![]() |
Լիլիան Շալառուն իր խոսքում նշեց, որ ԵԱՀԿ երևանյան գրասենյակն արդեն մի քանի տարի աջակցում է Հայաստանում համայնքային ոստիկանության մոդելի` որպես ժողովրդավարական ոստիկանական պրակտիկայի ներդրմանն ու իրագործմանը և հավելեց, որ ԵԱՀԿ գրասենյակը կշարունակի իր աջակցությունը Երևանում նոր մոդելի կիրառման գործում:
Երևանում նախատեսվում է ստեղծել համայնքային ոստիկանական ստորաբաժանումներ, որտեղ կներգրավվի մոտ 300 ոստիկան: ԵԱՀԿ երևանյան գրասենյակի աջակցությամբ մարտ ամսին կազմակերպվել են երեքշաբաթյա գործնական դասընթացներ համայնքային ոստիկանությունում ներգրավված ոստիկանների համար:
Միջոցառման ընթացքում Երևան քաղաքի ոստիկանության ստորաբաժանումների և ԶԼՄ ներկայացուցիչներին ներկայացվեց ,Համայնքային ոստիկանության ոլորտում ներգրավված ոստիկանության աշխատակիցների համար ուղեցույցըե (ուղեցույցի էլեկտրոնային տարբերակը կարելի է գտնել այստեղ http://www.osce.org/yerevan), որը մշակել է Միացյալ Թագավորությունից համայնքային ոստիկանության փորձագետ Դեյվիդ Այենսոնը` ԵԱՀԿ աջակցությամբ:
Հանդիպման ընթացքում քննարկվեցին փոխադարձ հետաքրքրություն ներկայացնող այլ հարցեր ևս: