Քրեական հետախույզներն ու պարեկները հայտնաբերեցին մեքենան ու գողացողին

Հոկտեմբերի 27-ին, ժամը 00.50-ին, ոստիկանության օպերատիվ կառավարման կենտրոն զանգած երիտասարդը հայտնել էր, որ գողացել են Մուրացանի փողոցում կայանած իր «Հունդաի» մակնիշի մեքենան:
Ոստիկանության Էրեբունու բաժնի քրեական հետախույզներն ու պարեկային ծառայության Երևանի գնդի ծառայողները համատեղ ձեռնարկած միջոցառումների շնորհիվ պարզել են, որ մեքենան փախցրել է սարիթաղցի 50-ամյա տղամարդը՝ օգտվելով դուռը բաց լինելու հանգամանքից:
Հոկտեմբերի 27-ի կեսգիշերին Լենինգրադյան փողոցում մեքենան հայտնաբերվել և կանգնեցվել է: 50-ամյա տղամարդը ձերբակալվել և տարվել է Էրեբունու բաժին: Անձնական խուզարկությամբ նրա մոտ հայտնաբերվել է 0,86 գրամ դեղնականաչավուն զանգված:
Նախապատրաստված նյութերը և մեքենան փախցրած տղամարդը ներկայացվել են նախաքննական մարմնին:
Կատարվում է նախաքննություն: