ՔՈԳՎ բացահայտումը. հայտնաբերվել են հերոին և մեթամֆետամին

Քրեական ոստիկանության գլխավոր վարչության թմրամիջոցների անօրինական շրջանառության դեմ պայքարի վարչությունում օպերատիվ տեղեկություն էր ստացվել. Սյունիքի մարզի Սիսիան քաղաքի 41-ամյա մի բնակիչ իր կողմից շահագործվող «Տոյոտա» մակնիշի ավտոմեքենայում պահում է առանձնապես խոշոր չափերի թմրամիջոցներ։
Վարչության ծառայողները անմիջապես ձեռնարկեցին անհրաժեշտ գործողություններ՝ համագործակցելով Կոտայքի մարզային վարչության, Նաիրիի բաժնի և Կոտայքի մարզի պարեկների հետ։ Մարտի 1-ին, ժամը 18-ին, ապօրինի թմրամիջոցներ ձեռք բերելու, պահելու և իրացնելու հիմնավոր կասկածանքով, 41-ամյա տղամարդը Նոր Հաճնում ձերբակալվեց և, «Տոյոտայով» հանդերձ, տեղափոխվեց ոստիկանության Նաիրիի բաժին։ Նա ներկայացվել է քննչական բաժին, որտեղ նախաձեռնվել է քրեական վարույթ։
Մեքենայի զննության ժամանակ տղամարդը սրահից ներկայացրել է 107,74 գրամ հերոին և 108,83 գրամ մեթամֆետամին տեսակի թմրամիջոցներ։
Կատարվում է նախաքննություն։