Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)
21.07.2015 17:46
Համակարգի լրատու
![Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ) Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)](/timthumb?src=/resources/police/img/news/big/1437486518,9137.jpeg&q=75&w=780&wm=1)
Հուլիսի 21-ին մեր հայրենակիցները հերթական անգամ Skype-ի միջոցով իրենց հետաքրքրող հարցերն ուղղեցին ոստիկանության անձնագրային և վիզաների վարչության պետի տեղակալ, ոստիկանության փոխգնդապետ Մնացական Բիչախչյանին:
ՌԴ-ում գտնվող քաղաքացին հայտնեց, որ իր աղջիկը 19 տարեկան է, ՀՀ պետական սահմանը հատելիս անձնագրի օտարերկրյա պետությունում վավերականության նշման ժամկետի լրանալուն մնացած է եղել 3 օր: ՌԴ-ում գտնվելիս արդեն իսկ լրացել է ժամկետը: Քաղաքացին ցանկանում էր տեղեկանալ, ինչ պետք է անել անձնագրում օտարերկրյա պետությունում վավերականության նշում կատարելու համար: Պարզաբանվել է գործող կարգը, համաձայն որի` կարող են դիմել օտրարեկրյա պետությունում գտնվող դիվանագիտական ծառայություն կամ լիազորված անձի միջոցով ՀՀ-ում գտնվող անձնագրային ծառայություն՝ ներկայացնելով լիազորությունը հավաստող փաստաթուղթը:
Բուլղարիայում գտվող մեր հայրենակիցը հայտնել է, որ ընտանիքով մեկնել են Բուլղարիա, վիզայի ժամկետը մինչև սեպտեմբեր ամիսն է: Այլ իրերի և փաստաթղթերի հետ միասին Բուլղարիայում գողացել են նաև նրանց անձը հավաստող փաստաթղթերը: Նրանց տեղեկացվեց գործող կարգը, համաձայն որի` պետք է դիմել դիվանագիտական ծառայություն` անձնագիր կամ վերադարձի վկայական ստանալու համար: Պարզաբանվել է նաև ՀՀ կառավարության 2013 թվականի հոկտեմբերի 23-ի որոշման պահանջը, համաձայն որի` Հայաստանի Հանրապետություն վերադարձի վկայականը տրվում է անվճար` հափշտակության կամ այլ հանցագործության դեպքում, եթե ներկայացվում է տվյալ հանգամանքն ապացուցող փաստաթուղթ:
Զանգահարել է օտարերկրյա պետությունում գտնվող քաղաքացին և տեղեկացրել, որ իր տղան 23 տարեկան է, ՌԴ քաղաքացի է և օրենքի ուժով չի համարվում ՀՀ քաղաքացի: Ծառայել է ՌԴ զինված ուժերում: Քաղաքացուն հետաքրքրում էր` ՀՀ քաղաքացիություն ստանալու դեպքում որդին ՀՀ զինված ուժերում ծառայելո՞ւ է, թե՝ ոչ: Նրան պարզաբանվեց ՀՀ օրենսդրության պահանջը, համաձայն որի` Հայաստանի Հանրապետության քաղաքացիություն ընդունած այլ պետության քաղաքացին ազատվում է պարտադիր զինվորական ծառայությունից, եթե մինչև Հայաստանի Հանրապետության քաղաքացիություն ընդունելը ոչ պակաս, քան 12 ամիս ծառայել է այլ պետության զինված ուժերում կամ այլ պետությունում ոչ պակաս, քան 18 ամիս անցել է այլընտրանքային զինվորական ծառայություն: