Կոտայքի պարեկները զենք-զինամթերք են հայտնաբերել

Նոյեմբերի 16-ին Կոտայքի պարեկները Քաղսի գյուղում ծառայություն կատարելիս նկատել են առանց դիմացի համարանիշի «Կիա» մակնիշի մի մեքենա: Թերությունը վերացնելու համար պարեկները վարորդին հորդորել են տեղադրել համարանիշը: Իսկ երբ վարորդը համարանիշը փնտրում էր մեքենայի սրահում, նրա նստելատեղի տակ պարեկները նկատել են թղթով փաթաթված կասկածելի իր: 32-ամյա վարորդը հայտնել է, որ փաթեթում ինքնաձիգի փամփուշտներ են։ Ապօրինի ռազմամթերք պահելու կասկածանքով հրազդանցի վարորդը ձերբակալվել և, մեքենայով հանդերձ, տեղափոխվել է Հրազդանի բաժին, որտեղ ներկայացրել է ինքնաձիգի 30 փամփուշտ:
Հաջորդ դեպքում Կոտայքի գումարտակի 2-րդ վաշտի 1-ին դասակի պարեկները Ջրվեժ համայնքում ծառայություն կատարելիս նկատել են «Լադա» մակնիշի մի մեքենա, որի վարորդը ամրակապված չէր։ Իրավախախտումն արձանագրելու ընթացքում պարեկները մեքենայի սրահի տեսանելի հատվածում նկատել են զենքի նմանվող իր։ 30-ամյա հովտաշենցի վարորդը հայտնել է, որ այն գազային ատրճանակ է։ Նա ձերբակալվել և, մեքենայով հանդերձ, տեղափոխվել է ոստիկանության Կոտայքի բաժին։
Հանգամանքները նախաքննությամբ պարզվում են։