ՊԱՐԶԱԲԱՆՈՒՄ

Yerkir.am կայքն իր ընթերցողին «ուրախացրել է» ոստիկանության լրատվականի «կիքսը» բռնելով և իր չիմացության պատճառով իսկական «կիքսի» մեջ է ընկել: 

Հիշյալ կայքը օրեր առաջ գրավոր հարցում է արել ոստիկանության ՀԿԼ վարչությանը՝ խնդրելով 2008-2014 թթ. կատարված հանցագործությունների և բացահայտված հանցագործությունների թվաքանակը: Հարցմանը պատշաճ կերպով պատասխանվել է՝ բացատրելով նաև վերջին տարիներին գրանցվա՛ծ  հանցագործությունների աճի պատճառը. «Հանցագործությունները հաշվառումից թաքցնելու արատավոր գործելաոճի բացառման և քողարկված բնույթ կրող հանցագործությունների հայտնաբերման ուղղությամբ ՀՀ ոստիկանության կողմից կատարված աշխատանքները մեծապես նպաստել են վերջին տարիներին հանրապետությունում գրանցված  հանցագործությունների թվաքանակի աճին»: 

Սևով սպիտակին գրված է ու թվում էր՝ տարընթերցման առիթ չպիտի տա, սակայն չհասկացողների համար կրկին ու վանկ առ վանկ բացատրենք. աճել է ոչ թե հանցագործությունների թիվը, այլ՝ գրանցվա՛ծ հանցագործությունների թիվը, քանի որ ներկայումս չեն թաքցվում, գրանցվում են բոլոր հանցագործությունները, ինչը նախորդ տարիներին գոյություն ունեցած՝ հանցագործությունները գրանցումից թաքցնելու արատավոր գործելաոճի վերացման ուղղությամբ կատարված աշխատանքների արդյունքն է: 

Հիմա հասկանալի՞ Է: Ո՞չ: Առավել մանրամասնենք. կատարված հանցագործությունները նախկինում որոշ ծառայողների կողմից պաշտոնապես չէին գրանցվում՝ վիճակագրությունը «դրական» ներկայացնելու համար: Ոստիկանության ղեկավարությունն այս տարիներին խնդիր է դրել՝ բացառել այդ արատավոր մոտեցումը, ինչի արդյունքում հանցագործությունների թվային  աճ է գրանցվել: Ավելին՝ որոշ ոստիկաններ քրեական պատասխանատվության են ենթարկվել հանցագործությունների դեպքերը չգրանցելու համար: Եթե այսուհետ էլ նման դեպքեր բացահայտվեն՝ հավաստիացնում ենք, որ մեղավորները կպատժվեն խստագույնս:

Հիմա դառնանք «կիքսոտվելու» վտանգին: 

Բարի, գործընկերային խորհուրդ Yerkir.am-ին. տղե՛րք, նաև աղջիկնե՛ր, չիմանալը մեղք չի, չսովորելն ու չիմացածի մասին ինքնավստահ աղաղակելն է մեղք, իսկ սեփական անգիտությունն ուրիշին վերագրելը  պարզապես բարոյական չէ: Նորից ենք խնդրում. եթե որևէ բան չեք հասկանում՝ դիմեք, կբացատրե՛նք: