Սարդարապատի խորհուրդը (ՏԵՍԱՆՅՈՒԹ ԵՎ ԼՈՒՍԱՆԿԱՐՆԵՐ)

Մարդկության պատմության քիչ ճակատամարտեր են վճռել մի ողջ ժողովրդի լինել-չլինելու հարցը: Սարդարապատի ճակատամարտը այդ քչերից է: Եվ 95 տարի առաջ Սարդարապատում մեր ժողովուրդը զենքով հավաստեց իր միակամ վճիռը` լինե՛լ:
Մայիսի 28-ը ոչ միայն հայոց պետականության վերականգնման ու Հանրապետության ծննդյան տոնն է, այլեւ Սարդարապատի հերոսներին մեր երախտագիտությունը հայտնելու, սարդարապատյան հրաշքի ոգեկոչման եւ հաղթանակով վերստին զորանալու օր:
Սարդարապատում հայի գենը հիշեց հաղթելու իր ունակությունը, թոթափվեց խեղճի, հնազանդի, զոհի իրեն պարտադրված կերպարից, հավատաց իր ուժին եւ այդ հավատը նոր հաղթանակներ բերեց` Բեռլինից մինչեւ Շուշի:
Ու դեռ բերելու է:
Եվ ամեն մայիսի Սարդարապատի հուշահամալիրին դրվող հիշողության ու երախտիքի ծաղիկները հավաստումն են, որ մեծ ճակատամարտով սերտած այս ճշմարտությունը այլեւս մեր արյան մեջ է` դառնալով պետության պաշտամունք, միասնության կոչ ու հարատեւման հավատամք: