Օրինահարգ ու բարեկիրթ սերունդ ձևավորելու դասը վարում էին ոստիկանն ու փրկարարը

Անչափահասների հետ ամենօրյա նպատակային և արդյունավետ աշխատանքը, իրավագիտակից քաղաքացի ձևավորելու գործընթացը ենթադրում են բազմաշերտ և հետևողական գործունեություն։
Ընտանիք, դպրոց, հասարակություն, անհրաժեշտ գիտելիքներ, համակեցության կանոններ, իրավունքների ու պարտականությունների գիտակցում. այս ամենի համակողմանի և ճիշտ համադրման դեպքում ցանկալի արդյունքն ապահովված է։
Այս իրողության անհրաժեշտությամբ պայմանավորված՝ հունվարի 22-ից 26-ը ՀՀ ՆԳՆ ոստիկանության անչափահասների հանցավորության և ընտանեկան բռնության կանխարգելման վարչության, տարածքային ստորաբաժանումների ծառայողների, ինչպես նաև պարեկային և փրկարար ծառայությունների ներկայացուցիչների մասնակցությամբ հանրապետության հիմնական դպրոցներում անցկացվեցին զրույց-հանդիպումներ։
Թեմաներն ընդգրկում էին տարբեր ոլորտներ՝ իրավունքներ ու պարտականություններ, ճանապարհային երթևեկության կանոնների պահպանում, վարքի և համակեցության կանոններ, փողոցային բարքերի ու հանցավոր ենթամշակույթների բացառում և այլն։
Հանդիպումներն անցան ջերմ և անմիջական մթնոլորտում, իսկ հարցերն ու պատասխաններն անկեղծ էին ու շահագրգիռ։
Նման հանդիպում-զրույցները շարունակական են լինելու՝ ի նպաստ ոստիկան-փրկարար-անչափահաս կապի ամրապնդման, ի շահ օրինահարգ ու բարեկիրթ սերունդ ձևավորելու կարևորագույն նպատակի։