Վաղարշապատի ոստիկանները բացահայտել են մեքենաներից կատարված գողություններ

Փետրվարի 14-ին, ժամը 17.40-ին, ոստիկանության Վաղարշապատի բաժնի քրեական հետախույզները Սուրբ Հռիփսիմե եկեղեցու մոտից բերման են ենթարկել 62-ամյա մի տղամարդու: Օպերատիվ տվյալներ էին ստացվել, որ երևանցի տղամարդը մոտ մեկ ժամ առաջ գողություն է արել եկեղեցու մոտ կայանված մեքենայից: Տվյալները հաստատվեցին. տղամարդը խոստովանեց, որ տեխնիկական միջոց գործադրելով՝ կոտրել էր «Կիա Ֆորտե» մակնիշի մեքենայի ապակին ու գողություն արել:
Գողոնը հայտնաբերվել ու վերադարձվել է տիրոջը, սակայն գործը սրանով չի ավարտվել: Իրավապահների բացատրական աշխատանքի շնորհիվ 62-ամյա տղամարդը խոստովանել է, որ փետրվարի 7-ին, կեսօրին մոտ, նույն տեղում կայանված մեկ այլ մեքենայի ապակին կոտրել ու գողացել էր կնոջ պայուսակ, որի մեջ մեքենայի փաստաթղթերը, տիրոջ անձնագիրն ու բանկային քարտեր էին: Դեպքերի հանգամանքները քննությամբ պարզվում են։