Պարզաբանում

«Չորրորդ իշխանություն» օրաթերթի փետրվարի 25-ի համարում, «Երբ ընտրակեղծիքները հիմա էլ են զգացնել տալիս» վերտառությամբ հրապարակման հեղինակը ներկայացրել է Աշտարակ քաղաքի Վարդգես Պետրոսյան փողոցի բնակչուհի, ոմն տիկին Գրիգորյանի գանգատը, թե իբր հիշյալ փողոցում գտնվող իր տան վրա ընտրությունների ժամանակ 5 հոգու են գրանցել, իսկ ինքը անտեղյակ է եղել։ Նշվում է, որ այդ հարցով տիկին Գրիգորյանը դիմել է նաև Աշտարակի քաղաքապետարան, որտեղից իրեն խորհուրդ են տվել դիմել Աշտարակի անձնագրային բաժին։
Նշված հրապարակման հիման վրա, ոստիկանության Աշտարակի բաժնում կատարված ստուգումներով պարզվել է, որ Աշտարակ քաղաքի Վարդգես Պետրոսյան փողոցում Գրիգորյան ազգանվամբ հաշվառված է 2 կին, որոնք ոստիկանության ծառայողներին հայտարարել են, որ իրենց բնակարաններում բացի հարազատներից այլ անձինք հաշվառված չեն, և իրենք նման խնդրով կարիք չունեին դիմելու ոչ Աշտարակի քաղաքապետարան, ոչ Աշտարակի անձնագրային ծառայություն, առավել ևս՝որևէ օրաթերթի խմբագրություն։
Թերթի խմբագրությանը կրկին խնդրում ենք՝ նշել խնդրո առարկա հասցեն և դիմողի ամբողջական տվյալները, նաև կոչ ենք անում կասկածելի և անփաստարկ տեղեկատվությամբ չոտնահարել ընթերցողի՝ տեղեկացված լինելու իրավունքը:

Հ.Գ. Ներկայացնում ենք հրապարակման առնչությամբ Աշտարակի քաղաքապետին ուղարկված մեր հարցման պաշտոնական պատասխանը: