Ոստիկաններն անչափահասների հետ Ամբերդի ամրոց և Վահրամաշեն եկեղեցի են այցելել

Ոստիկանության անչափահասների հանցավորության և ընտանիքում բռնության կանխարգելման վարչությունը շարունակում է ամառային արձակուրդների ընթացքում անչափահասների զբաղվածության խնդրի լուծման նպատակով կազմակերպվող միջոցառումներն ու հանդիպումները:
Օգոստոսի 12-ին մի խումբ անչափահասներ ոստիկանության մասնագիտացված ստորաբաժանումների ծառայողների ուղեկցությամբ մասնակցեցին ուխտագնացության՝ դեպի Արագածոտնի մարզ, որի ընթացքում այցելեցին Ամբերդ և Վահրամաշեն եկեղեցի:
Անչափահասները շրջեցին ամրոցի տարածքում, եկեղեցում մոմ վառեցին, Ամբերդի հոգևոր սպասավորի ուղեկցությամբ ծանոթացան միջնադարյան կառույցի և եկեղեցու պատմությանն ու ճարտարապետությանը:
Տեր Վրթանեսն անչափահասների հետ զրուցեց պարկեշտ պահվածքի, դաստիարակության, հոգևոր արժեքների մասին, հորդորեց պահպանել աստվածաշնչյան պատվիրանները և զերծ մնալ հակաիրավական արարքներից:
Կարևորելով օրինապահ վարքագծի դրսևորումը՝ ոստիկանության ծառայողները ևս անչափահասներին բացատրեցին, որ վնասկար սովորություններից, հանցագործություններից ու իրավախախտումներից անհրաժեշտ է զերծ մնալ։
Ուխտագնացությունն ավարտվեց Տերունական աղոթքով։ Երեխաներին բաժանվեցին աղոթագրքեր: