Կապանի համայնքային ոստիկանները հրդեհի վայրում հայտնաբերել են 12 կոճղ. ծառերն ապօրինի հատողը ներկայացվել է նախաքննական մարմին

Մարտի 12-ին ոստիկանության Սյունիքի մարզի օպերատիվ կառավարման կենտրոնից Համայնքային ոստիկանության Կապանի բաժին ստացվել է ահազանգ, որ Վաչագան բանավանի «Ղրբանց» կոչվող տարածքում հրդեհաշիջման ընթացքում հայտնաբերվել են հատած ծառեր և ծառ հատելու գործիքներ:
Մեկնած օպերատիվ խումբը նշված վայրում հայտնաբերել է 12 կոճղ:
Ձեռնարկված միջոցառումներով պարզվել է, որ ապօրինի ծառահատումը կատարել և փայտանյութն իր տան բակ է տեղափոխել նույն բանավանի բնակիչ 58-ամյա մի տղամարդ:
Բաժնում տղամարդը խոստովանել է կատարածը:
Կազմված փաստաթղթերը փոխանցվել են Սյունիքի մարզային քննչական վարչություն: