Արմավիրի քրեական հետախույզները մարիխուանայի իրացման դեպք են բացահայտել

Ոստիկանության Արմավիրի բաժնի քրեական հետախույզները բնակչության առողջության դեմ ուղղված հանցագործությունների կանխման ու բացահայտման ուղղությամբ ձեռնարկած միջոցառումների շրջանակում փետրվարի 19-ին, ապօրինի թմրամիջոց պահելու և օգտագործելու կասկածանքով, բաժին բերման ենթարկեցին Երևանի բնակիչ, 70-ամյա մի տղամարդու։ Տղամարդը խուզարկվեց։ Հայտնաբերվեց մարիխուանայի նմանվող զանգվածքվ երկու փաթեթ՝ 45 գրամից ավելի քաշով։ Նրա հայտնածով՝ փաթեթներում թմրամիջոց էր։ Դրանք ուղարկվեցին փորձաքննության։
Արմավիրի ոստիկանները հետախուզական միջոցառումները շարունակեցին։ Նրանց տեղեկություններով՝ 70-ամյա տղամարդուն թմրամիջոցն իրացրել էր Վարդանաշեն գյուղի 43-ամյա մի բնակիչ։ Տղամարդը վերցվեց քրեական հետախույզների օպերատիվ տեսադաշտ և շուտով հայտնաբերվեց, բերման ենթարկվեց բաժին ու ձերբակալվեց։ Հարուցված քրեական գործի շրջանակներում խուզարկություն կատարվեց նրա տանն ու օժանդակ շինություններում։ Հայտնաբերվեց 450 գրամից ավելի մարիխուանայի նմանվող դեղնականաչավուն զանգված։ Այն ևս ուղարկվեց փորձաքննության։
43-ամյա տղամարդուն մեղադրանք է առաջադրվել։ Նա դատարանի որոշմամբ կալանավորվել ու տեղափոխվել է քրեակատարողական հիմնարկ։
Հարուցված քրեական գործի նախաքննությունը շարունակվում է։