Օշական գյուղից Աշտարակի բաժին բերման ենթարկվածի խուզարկությամբ թմրամիջոց է հայտնաբերվել

Ոստիկանությունը շարունակում է թմրանյութերի անօրինական շրջանառության և օգտագործման դեմ հետևողական պայքարը:
Դեկտեմբերի 23-ին հերթական դեպքը ոստիկանության Աշտարակի բաժնի ծառայողները բացահայտեցին։
Ժամը 21.30-ի սահմաններում քրեական հետախույզները Օշական գյուղից, ապօրինի թմրամիջոց պահելու և օգտագործելու կասկածանքով, «Հունդայի» մակնիշի մեքենայով հանդերձ՝ բերման ենթարկեցին նույն գյուղի 36-ամյա մի բնակչի։
Նրա անձնական խուզարկությամբ, նաև մեքենայի զննությամբ հայտնաբերվեց երեք փաթեթ չորացված, մանրացված, յուրահատուկ հոտով բուսական զանգված:
Ըստ բերման ենթարկվածի` հայտնաբերվածը թմրամիջոց է, իր օգտագործման համար քաղել և պատրաստել է վայրաճ կանեփի թփերից:
Նշանակվել է փորձաքննություն:
Փաստի առթիվ նախապատրաստվում են նյութեր: