Աշտարակի ոստիկանները բնակարանային գողության դեպքեր են բացահայտել (ՏԵՍԱՆՅՈՒԹ)

Սեպտեմբերի 17-ին ոստիկանության Աշտարակի բաժնի քրեական հետախույզները օպերատիվ տվյալներ էին ստացել, որ Աղձք գյուղի 27-ամյա մի բնակիչ գողություններ է կատարում: Ձեռք բերված տեղեկությունների իսկությունը ստուգելուց հետո, կասկածվողը նույն օրը բերման ենթարկվեց ոստիկանության Աշտարակի բաժին, որտեղ էլ խոստովանեց կատարածը: Ըստ նրա` մարտից մինչև օգոստոս ամիսը, վարձով բնակարան փնտրելու պատրվակով մտել էր Աշտարակի տարբեր բնակարաններ ու փող գողացել:
Մայիսին Աշտարակ քաղաքի Տիգրան Մեծի փողոցի բնակարաններից մեկում միջանցքում կախված հագուստի գրպանից մի քանի հազար դրամ էր հափշտակել, մարտ ամսին նույն փողոցի մեկ այլ բնակարանի հյուրասենյակից ` դարձյալ փող: Օգոստոսին` օգտվելով Աշտարակի Ալեք Մանուկյան փողոցի բնակարաններից մեկի դուռը բաց լինելու հանգամանքից, մտել էր տուն, պայուսակից գողացել տանտիրուհու դրամապանակը: Օրեր անց նույն փողոցի մեկ այլ շենքում, դարձյալ վարձով բնակարան փնտրելու պատրվակով, տուն էր մտել ու միջանցքից հափշտակել տանտիրոջ դրամապանակը:
Տուժողներից ընդունվել է հաղորդում:
Հանգամանքները պարզվում են:
Գողության փաստով հարուցված քրեական գործի նախաքննությունը շարունակվում է: