ՀՀ ՆԳՆ ոստիկանության թեժ գիծ
  • Ընդհանուր հարցերով
    (+374) 10 54-69-14
    (+374) 10 54-69-12
    Աշխ. ժամեր՝ 9-ից 18-ը: Ընդմիջում՝ 13-ից 14-ը:
    Հանգստյան օրեր՝ շաբաթ, կիրակի:

Ոստիկանները հայտնաբերել ու բերման են ենթարկել Աշտարակում տեղի ունեցած խուլիգանության մասնակիցներին (ՏԵՍԱՆՅՈՒԹ)

Հուլիսի 8-ին՝ ժամը 12-ի սահմաններում, Արագածոտնի մարզը սպասարկող ՃՈ 2-րդ սպայական գումարտակի 2-րդ վաշտի ծառայողներից մեկը Աշտարակ քաղաքի Երևանյան փողոցում նկատել է մի խումբ անձանց, որոնք վիճել են ու փոխադարձ հարվածներ հասցրել։ Այդ ընթացքում նրանցից մեկը գազային ատրճանակով կրակոց է արձակել։ Ճանապարհային ոստիկանը միջամտել է, փորձել կարգի հրավիրել նրանց՝ վնասազերծելով ատրճանակով տղամարդուն։ Այդ ժամանակ վիճողները մեքենաներով փախել են։
Կատարվածի մասին ճանապարհային ոստիկանն անմիջապես հայտնել է Աշտարակի բաժին, որտեղից օպերատիվ խմբերը շտապել են միջադեպի մասնակիցների հեռացած ուղղություններով ու հետապնդել նրանց։ Ձեռնարկված օպերատիվ-հետախուզական միջոցառումների արդյունքում Աշտարակի ոստիկանները կարճ ժամանակում պարզել են միջադեպի մասնակիցների ինքնությունը և նույնքան էլ օպերատիվ նրանց հայտնաբերել ու բերման ենթարկել բաժին։
Բաժնի պահպանվող հատուկ տարածք տեղափոխված «Ինֆինիտիի» զննությամբ հայտնաբերվել է միջադեպի մասնակիցներից մեկի օդաճնշիչ ատրճանակը, իսկ գազայինը, որով կրակոց էր արձակվել, հայտնաբերվել է դեպքի վայրի զննությամբ։
Տարածքային նախաքննական մարմնում խուլիգանության հատկանիշներով քրեական գործ է հարուցվել։ Նշանակվել են դատաբժշկական ու դատաձգաբանական փորձաքննություններ։
Հանգամանքները պարզվում են։

`


Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: