Ընկերության փողերը ծախսել էր ու ավազակային հարձակում ձևացրել. Կոտայքի ոստիկանների բացահայտումը
![Ընկերության փողերը ծախսել էր ու ավազակային հարձակում ձևացրել. Կոտայքի ոստիկանների բացահայտումը Ընկերության փողերը ծախսել էր ու ավազակային հարձակում ձևացրել. Կոտայքի ոստիկանների բացահայտումը](/timthumb?src=/resources/police/img/news/big/1640161872-0292.jpeg&q=75&w=780&wm=1)
Դեկտեմբերի 22-ին, ժամը 00.40-ին, ոստիկանության օպերատիվ կառավարման կենտրոն ահազանգած տղամարդը հայտնել էր, որ Աբովյան-Ջրվեժ ճանապարհին առանց համարանիշերի «ՎԱԶ-2107» ավտոմեքենայի վարորդը կանգնեցրել է իր «Ֆորդ» ավտոմեքենան, դանակով խփել ոտքին և հափշտակել 2 750 000 դրամ:
Ահազանգը տարածքային կարգով փոխանցվեց ոստիկանության Կոտայքի բաժին։
Մեկնած օպերատիվ խմբի ծառայողները պարզել են, որ «Ֆորդի» 31-ամյա վարորդը սեպտեմբերից դեկտեմբերի 21-ն ընկած ժամանակահատվածում Աբովյան քաղաքի մեծածախ առևտրի կետից ապրանքի դիմաց մաս-մաս վերցրել էր մոտ 1 900 000 դրամ, որը պետք է փոխանցեր ընկերության տնօրենին, սակայն ծախսել էր անձնական կարիքների համար։ Դեկտեմբերի 21-ին հերթական խմբաքանակ ապրանքի դիմաց 850.000 դրամ վերցնելուց հետո հասկանալով, որ չի կարող տնօրենին վճարել 2 750 000 դրամը, որոշել էր ավազակային հարձակում ձևացնել։ Իր վարած «Ֆորդ Տրանզիտ» ավտոմեքենայում պահվող խոհանոցային դանակով վնասել էր ձեռքի ափն ու ազդրը և պատռել տաբատի գրպանները:
Տղամարդը հրավիրվել է ոստիկանության Կոտայքի բաժին, տվել խոստովանական բացատրություն և ներկայացրել փողն ու խոհանոցային դանակը:
Կատարվում է քննություն։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: