Ավազակությունն ու կողոպուտը կատարել էր նույն երիտասարդը․ Կենտրոնի ոստիկանների բացահայտումը (ՏԵՍԱՆՅՈՒԹ)

Սեպտեմբերի լույս 17-ի գիշերը ոստիկանության Կենտրոնական բաժնում մի տաղամարդուց հաղորդում էր ստացվել, որ իրեն ծեծել են ու պայուսակը հափշտակել։ Դեպքի առթիվ քրեական գործ հարուցվեց կողոպուտի հատկանիշներով։ Սեպտեմբերի լույս 22-ի գիշերը ոստիկանության Կենտրոնական բաժնում նմանատիպ ևս մեկ ահազանգ էր հնչել։ Մի տղամարդու դարձյալ ծեծել էին և պայուսակն ու բջջային հեռախոսը հափշտակել։ Այս դեպքում տուժողը կոտրվածքով տեղափոխվել էր թիվ 1 համալսարանական հիվանդանոց։ Դեպքի առթիվ քրեական գործ հարուցվեց ավազակության հատկանիշներով։
Ոստիկանության Կենտրոնական բաժնի քրեական հետախույզները, ձեռնարկելով ծավալուն օպերատիվ միջոցառումներ, փաստական տվյալներ ձեռք բերեցին, որ երկու հանցագործությունն էլ կատարել է նույն անձը։ Հոկտեմբերի 14-ին Արմավիր քաղաքի բնակիչ, 17-ամյա երիտասարդը հայտնաբերվեց ու բերման ենթարկվեց ոստիկանության Կենտրոնական բաժին, ապա ներկայացվեց տարածքային քննչական բաժին ու ձերբակալվեց։ Դեպքերի հանգամանքները պարզելու ուղղությամբ օպերատիվ-քննչական միջոցառումները շարունակվում են։