Ավազակությամբ փող էր հափշտակել. Սիսիանում կատարված դեպքը բացահայտվել է
![Ավազակությամբ փող էր հափշտակել. Սիսիանում կատարված դեպքը բացահայտվել է Ավազակությամբ փող էր հափշտակել. Սիսիանում կատարված դեպքը բացահայտվել է](/timthumb?src=/resources/police/img/news/big/1627286055-6656.jpeg&q=75&w=780&wm=1)
Հուլիսի 24-ին, ժամը 16.20-ին, 69-ամյա մի կին ոստիկանության Սիսիանի բաժին հաղորդում էր տվել, որ ժամը 14.00-ի սահմաններում, անծանոթ մի կին, օգտվելով իր միայնակ ապրելու և տան մուտքի դուռը բաց լինելու հանգամանքից, մտել էր բնակարան, հեղուկ փչել իր վրա, հրել գցել էր և փորձել ինչ-որ հեղուկ լցնել բերանը, ապա ձեռքերով և ծաղկամանով հարվածելով՝ փող էր պահանջել: Կինը նրան էր տվել 840.000 դրամ և 100 դոլար։
Ոստիկանության Սյունիքի մարզային վարչության, Սիսիանի բաժնի և Սիսիանի քննչական բաժնի ծառայողների համատեղ ձեռնարկած օպերատիվ-հետախուզական միջոցառումների և քննչական գործողությունների շնորհիվ պարզվել է, որ բռնություն գործադրելով՝ խոշոր չափի գումարը հափշտակել էր 34-ամյա կին:
Ժամը 16.50-ին 34-ամյա կինը հայտնաբերվել, բերման է ենթարկվել ոստիկանության Սիսիանի բաժին, ապա ներկայացվել է նախաքննական մարմնին և ձերբակալվել:
Հափշտակված փողի մի մասը հայտնաբերվել է:
Սյունիքի մարզային վարչության, Սիսիանի բաժնի և Սիսիանի քննչական բաժնի ծառայողների համակարգված գործողությունների արդյունքում պարզվել է նաև, որ հանցագործության կատարմանը օժանդակել էր Որոտան գյուղի բնակիչ, 43-ամյա մի տղամարդ։ Հուլիսի 25-ին նա ևս հայտնաբերվել ու բերման է ենթարկվել ոստիկանության Սիսիանի բաժին։ Տղամարդը ներկայացվել է նախաքննական մարմնին, տվել խոստովանական ցուցմունք և ձերբակալվել:
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: