Քրեական ոստիկանության Արմավիրի մարզային վարչության ծառայողների բացահայտումներից դրվագներ

Նոյեմբերի 27-ին Քրեական ոստիկանության Արմավիրի մարզային վարչության ծառայողները տեղեկութուն ստացան թմրամիջոց ապօրինի պահելու և օտագործելու վերաբերյալ: Նախաձեռնվեց քրեական վարույթ, որի շրջանակում էլ քրեական ոստիկանները մեկնեցին Արմավիր քաղաքի Ջահանգիր Աղայի փողոց: Ըստ օպերատիվ տեղեկության` 52-ամյա տղամարդը հենց այս փողոցի իր տանն էր պահում թմրանյութը: Զննության ընթացքում տնամերձ հողամասում դրված սառնարանի միջից տանտերը ներկայացրեց պոլիէթիլենային տոպրակ ու ստվարաթղթե տուփ` ընդհանուր 80 գրամ կանեփանման չորացված-մանրացված զանգվածով: 52-ամյա տղամարդը կանեփանման բույսի ավելի քան 90 գրամ չոր զանգված էլ ներկայացրեց բետոնե խողովակի միջից:
Կազմված փաստաթղթերն ուղարկել են Արմավիրի մարզային քննչական վարչություն:
Նոյեմբերի 28-ին Արմավիրի քրեական ոստիկանները ստացան օպերատիվ տեղեկություն ընդերքի պահպանման և օգտագործման կանոնները խախտելու վերաբերյալ: Ըստ տվյալի` ՍՊ ընկերությունը Նոր Արտագերս գյուղի մոտ` երկուսուկես հեկտար գյուղատնտեսական նշանակության հողատարածքում, առանց համապատասխան թույլտվության իրականացնում է ավազակոպճագլաքարային խառնուրդի արդյունահանում:
Տեղեկության ստուգումն իրականացվեց Համայնքային ոստիկանության Արմավիրի բաժնի ծառայողների հետ համատեղ: Նույն օրը ոստիկանները հիշյալ տարածքում հայտնաբերեցին քանդման աշխատանք կատարող էքսկավատոր, ավազակոպճագլաքարային խառնուրդով բարձած բեռնատարներ, ավազի լվացման կետ:
Արդյունահանման գործողությունները դադարեցվել են, տարածքում սահմանվել է վերահսկողություն: Կազմված փաստաթղթերը ներկայացվել են Արմավիրի մարզային քննչական վարչություն:
Նույն օրը Արմավիրի քրեական ոստիկանները ստացան նաև ապօրինի պահվող զենք-զինամթերքի վերաբերյալ օպերատիվ տվյալ: Ըստ տեղեկության` Մրգաշատ գյուղի բնակիչ 36-ամյա տղամարդը տանը պահում է ինքնաձիգ: Տեղեկությունը ստուգվեց ու հաստատվեց: Ցերեկվա ժամը երեքին քրեական ոստիկաններն այցելեցին տղամարդուն, սակայն պարզվեց, որ նա մեկնել է արտերկիր: Նրա եղբայրը ներկայացրեց «Սայգա» մոդելի առանց համապատասխան փաստաթղթերի հրազեն, որը, ըստ նախնական տեղեկության, 36-ամյա տղամարդը ձեռք էր բերել վերջին պատերազմի ժամանակ:
Այս դեպքով ևս կազմված փաստաթղթերն ուղարկվել են Արմավիրի մարզային վարչություն:
Հանգամանքները պարզվում են: