Գողացած հեռուստացույցն ու վառարանը կամրջի տակ էր թաքցրել. Վանաձորի ոստիկանների բացահայտումը

Հոկտեմբերի 28-ին, օրը ցերեկով, Վանաձորի Թորոսյան փողոցի մի տնից գողություն էին արել: Հարմարեցված գործիքով բացել էին դարպասը, տան դուռը բաց էր եղել, մտել էին ներս ու գողացել էլեկտրական վառարան և հեռուստացույց։ Ոստիկանության Տարոնի բաժնի ծառայողները գողության մասին հաղորդումը ստանալուն պես մեկնեցին դեպքի վայր։ Բնակարանային գողության փաստով Լոռու մարզային վարչությունում հարուցվեց քրեական գործ։ Հետաքննություն իրականացնող մարմինը ձեռնարկեց համապատասխան միջոցառումներ, և ջանքերն ապարդյուն չանցան: Հաղորդումից երեք օր անց բնակարանային գողությունը բացահայտվեց: Նոյեմբերի 1-ին ոստիկանության Տարոնի բաժին բերման ենթարկվեց Վանաձորի Մոսկովյան փողոցի 51-ամյա մի բնակիչ։ Նա ոչ միայն խոստովանեց կատարածը, այլև քննչական փորձարարության ժամանակ ներկայացրեց, թե որտեղ էր թաքցրել գողոնը: Վանաձորի 3-րդ թաղամասում կամրջի տակ էր պահել։
Հարուցված քրեական գործի նախաքննությունը շարունակվում է: