Մարտունու ոստիկանները բացահայտել են Վարդենիկում կատարված բնակարանային գողությունը

Փետրվարի 23-ին ոստիկանություն զանգած Գեղարքունիքի մարզի Վարդենիկ գյուղի բնակիչը հայտնել էր, որ իր տնից փող են գողացել:
Դեպքի վայր մեկնած ոստիկանության Մարտունու բաժնի օպերատիվ խումբը պարզել է, որ փետրվարի 22-ի ժամը 16.30-ից փետրվարի 23-ի ժամը 00.30 ընկած ժամանակահատվածում, օգտվելով տանտերերի բացակայությունից, լոգարանի բաց պատուհանով մուտք էին գործել առանձնատուն և գողացել 200.000 դրամ, 10.000 ռուբլի ու 500 դրամ անվանական արժեքով մետաղադրամներ՝ պատճառելով շուրջ 770.000 դրամի վնաս:
Ոստիկանության Մարտունու բաժնի քրեական հետախույզների ձեռնարկած օպերատիվ-հետախուզական միջոցառումների շնորհիվ, գողությունը կատարելու կասկածանքով, փետրվարի 24-ին բաժին բերման են ենթարկվել Վարդենիկ գյուղի երեք բնակիչ, որոնք խոստովանել են, որ գողությունն արել են իրենք:
27-ամյա երիտասարդի անձնական խուզարկությամբ հայտնաբերվել է 5000 ռուբլի և 20 հազար դրամ, իսկ 17-ամյա պատանին խոստովանել է, որ գողացած ոսկյա ականջօղերը վաճառել են:
Ձեռնարկվում են միջոցառումներ՝ գողոնի մյուս մասը հայտնաբերելու ուղղությամբ:
Բերման ենթարկվածները ձերբակալվել են:
Քրեական օրենսգրքի 177-րդ հոդվածի հատկանիշներով քրեական գործ է հարուցվել:
Կատարվում է նախաքննություն: