Ոստիկանները բացահայտել են Քանաքեռ-Զեյթունում կատարված բնակարանային գողությունը

Հուլիսի 5-ին, ժամը 12.00-ի սահմաններում, ոստիկանության Քանաքեռ-Զեյթունի բաժնում Ազատության պողոտայի մի բնակչուհի հաղորդում է տվել, որ հունիսի 23-ին ժամը 18.00-ից մինչև ժամը 20.00-ն, օգտվելով այն հանգամանքից, որ նույն հասցեում բնակվող իր մայրն առողջական խնդիրներ ունի և չի կարողանում տեղաշարժվել, նշված բնակարանի ննջասենյակում դրված պայուսակից գողացել են 42.000 դրամ և 30.000 ՌԴ ռուբլի՝ պատճառելով մոտ 270.000 դրամի վնաս:
Անհետաձգելի օպերատիվ-հետախուզական միջոցառումների արդյունքում, քրեական հետախույզները պարզել են, որ նշված գողությունը հնարավոր է կատարած լինի Վարդաշենում հաշվառված, տարեց կնոջ 29-ամյա խնամակալը: Նույն օրը, ժամը 14:30-ի սահմաններում, Կարապետ Ուլնեցի 2 փակուղու շենքերից մեկում կասկածվողն հայտնաբերվել և բերման է ենթարկվել ոստիկանության Քանաքեռ-Զեյթունի բաժին: Նա տվել է խոստովանական բացատրություն:
Հանգամանքները պարզվում են:
Փաստի առթիվ նախապատրաստվում են նյութեր: