Իջևանի համայնքային ոստիկանները բացահայտել են ապօրինի ծառահատման դեպքը
Ոստիկանությունը շարունակում է իրականացնել բնապահպանական ոլորտի հանցագործությունները կանխելուն և բացահայտելուն ուղղված միջոցառումները։
Ապօրինի ծառահատումների հերթական դեպքի հետևանքով պետությանը պատճառվել էր 1 միլիոն 75 հազար դրամի վնաս:
Համայնքային ոստիկանության Իջևանի բաժնի ծառայողները «Հայանտառ» ՊՈԱԿ-ի Իջևանի անտառպետության տարածքներից մեկում հայտնաբերել են փայտանյութով բարձված «ԳԱԶ-66» մակնիշի մեքենա, իսկ մեքենայի մոտակայքում հայտնաբերվել է տարբեր ծառատեսակների 32 կոճղ:
«ԳԱԶ-66»-ը տեղափոխվել է Իջևանի անտառտնտեսություն մասնաճյուղի պահեստ:
Ձեռնարկված միջոցառումների արդյունքում պարզվել է, որ ապօրինի ծառահատումը կատարել են Հովք գյուղի 34-ամյա և 52-ամյա երկու բնակիչ: Նրանք հրավիրվել են Համայնքային ոստիկանության Իջևանի բաժին։
Կազմված փաստաթղթերը ներկայացվել են Տավուշի մարզային քննչական վարչություն:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
