Ճամբարակի ոստիկանները թմրանյութի օգտագործման և իրացման դեպք են բացահայտել

Թմրանյութերի օգտագործման, իրացման կամ անօրինական շրջանառության յուրաքանչյուր նոր դեպք արձանագրելիս ոստիկանությունն իրազեկում է հասարակությանը, ինչը կանխարգելիչ նպատակ ունի և ինքնին զգոնության կոչ է:
Օրերս հերթական բացահայտումը գրանցվեց Գեղարքունիքի մարզում: Ոստիկանության Ճամբարակի բաժնում տեղեկություններ էին ստացվել, որ Դրախտիկ գյուղի 27-ամյա մի բնակիչ ապօրինի թմրանյութ է պատրաստում, օգտագործում և իրացնում: Փետրվարի 2-ին նա բերման ենթարկվեց ոստիկանության Ճամբարակի բաժին: Ավելի ուշ Դրախտիկ գյուղի մի կիսաքանդ շինության քարերի արանքից ներկայացրեց մարիխուանայի նմանվող զանգված: Ըստ նրա՝ հայտնաբերվածը մարիխուանա է: Մշակումն արգելված կանեփն ինքն է աճեցրել, չորացրել իր օգտագործման համար:
Հետագա միջոցառումներով ոստիկանները պարզեցին, որ հունվարին նա համագյուղացուն մարիխուանա է հյուրասիրել:
Նույն օրը բերման ենթարկվեց նաև 28-ամյա համագյուղացին:
Նրանք տվել են խոստովանական բացատրություններ:
Նշանակվել է դատաքիմիական փորձաքննություն:
Հանգամանքները պարզվում են: