Հարևանին դանակահարած տղամարդը ձերբակալվել է. Կապանի ոստիկանների բացահայտումը

Ապրիլի 30-ին, առավոտյան ժամը 7-ին մոտ, «Կապան» բժշկական կենտրոնից հաղորդում ստացվեց ոստիկանության Կապանի բաժին. կրծքավանդակի թափանցող վերքով բուժօգնության էր տեղափոխվել Կապանի բնակիչ, 39-ամյա տղամարդ:
Բաժնի օպերատիվ խումբը մեկնեց հիվանդանոց, սակայն տուժած տղամարդուց որևէ բան ճշտել չհաջողվեց. ըստ բժշկի` ի վիճակի չէր բացատրություն տալու:
Ձեռնարկվեցին օպերատիվ-հետախուզական միջոցառումներ: Պարզվեց, որ գործողությունները ծավալվել էին նույն շենքի բնակիչ-հարևանների միջև: Ապրիլի լույս 5-ի գիշերը միջանձնային հարցերի շուրջ վեճ էր ծագել Արամ Մանուկյան փողոցի 3-րդ շենքի բնակարաններից մեկում։ Պարզվեց, որ միջադեպը սկսվել էր կասկածվողի տանը։ Հենց նա էլ վեճի ընթացքում խոհանոցային դանակով խփել էր 39-ամյա տղամարդու կրծքավանդակին:
Առավոտյան ժամը 9-ին 35-ամյա տղամարդը բերման ենթարկվեց ոստիկանության Կապանի բաժին։ Նա խոստովանել է արարքը:
Հարուցվել է քրեական գործ: 35-ամյա տղամարդը ձերբակալվել է։