ՀՀ ոստիկանություն-ԵԱՀԿ համագործակցությունը շարունակվում է (ՏԵՍԱՆՅՈՒԹ և ԼՈՒՍԱՆԿԱՐՆԵՐ)

Սեպտեմբերի 5-ին ոստիկանության կրթահամալիրն ընդունել էր  բարձրաստիճան հյուրերի` ԵԱՀԿ Երեւանյան գրասենյակի ղեկավար, դեսպան Անդրեյ  Սորոկինին, ռազմաքաղաքական հարցերով պատասխանատու Լիլիան Շալառուին, ոստիկանության գծով փորձագետ Ուլֆ Ջոնսոնին, ՀՀ  ոստիկանության շտաբի պետ,  ոստիկանության գեներալ-մայոր  Վարդան Եղիազարյանին:

Առիթը հիշարժան էր. կրթահամալիրի մարզադահլիճները կահավորվեցին մարզագույքով:  Նվիրատվությունը ԵԱՀԿ երեւանյան գրասենյակի կողմից էր: 

Ոստիկանության կրթահամալիրի նյութատեխնիկական  հագեցվածության խնդիրը միշտ էլ  ոստիկանության  ղեկավարության ուշադրության կենտրոնում է, իսկ ԵԱՀԿ երեւանյան գրասենյակի հետ սերտ համագործակցությամբ այն վաղուց  գործնական բնույթ է կրում:    

Անդրադառնալով ԵԱՀԿ երեւանյան գրասենյակի  հետ գործընկեությանը` ոստիկանության շտաբի պետ  Վարդան Եղիազարյանը  նշեց, որ բարեփոխումների փուլ թեւակոխելուց հետո Հայաստանի ոստիկանությունը մշտապես  զգացել է ԵԱՀԿ երեւանյան գրասենյակի կողմից ցուցաբերվող իրական աջակցությունն ու օժանդակությունը: 

Շնորհակալություն հայտնելով այս նախաձեռնության համար` կրթահամալիրի պետ, ոստիկանության գեներալ-լեյտենանտ Հովհաննես Վարյանը ներկայացրեց այն ծավալուն միջոցառումները, որոնք ուղղված են կրթահամալիրում ժամանակակից մեթոդների ներդրմանն ու  կրթության որակի  բարձրացմանը: Իսկ հագեցած  մարզադահլիճներում այսուհետ  իրենց  մարտական ու ֆիզիկական պատրաստականությունը կկատարելագործեն ապագա  ոստիկանները: