Էրեբունու ոստիկանները բացահայտեցին Աճեմյան փողոցում արված բնակարանային գողությունը

Հունիսի 6-ի առավոտյան ոստիկանության Էրեբունու բաժնում բնակարանային գողության վերաբերյալ հաղորդում ստացվեց։ Աճեմյան 2-րդ նրբանցքի բնակչուհիներից մեկը 10 րոպեով տնից դուրս էր եկել, իսկ դուռը չէր կողպել: Վերադառնալուց հետո տեսել էր, որ բջջային հեռախոսը գողացել են։ Նախնական տվյալներով՝ կնոջը պատճառվել էր 90 հազար դրամի վնաս։ Դեպքի առթիվ քրեական գործ հարուցվեց։ Էրեբունու ոստիկանները տարածքում օպերատիվ հարցումներ և օպերատիվ-հետախուզական միջոցառումներ սկսեցին և կարճ ժամանակ անց տեղեկություն ստացան բնակարան մտած ու գողություն արած անձի ինքնության վերաբերյալ։ 44-ամյա տղամարդը հայտնաբերվեց ու կասկածանքով բերման ենթարկվեց ոստիկանության Էրեբունու բաժին, ապա ներկայացվեց դեպքի նախաքննությունը վարող մարմնին ու տվեց խոստովանական ցուցմունք։ Գողոնը հայտնաբերվել է։ Նախաքննությունը շարունակվում է։