Մեքենաներից գողություն և գողության փորձ կատարողը հայտնաբերվեց

Մարտի 7-ին ոստիկանության Երևան քաղաքի վարչության ՔՀԲ 5-րդ բաժանմունքի ծառայողները Շիրակի փողոցից, գողություն կատարելու կասկածանքով, բերման են ենթարկել 31-ամյա մի տղամարդու: Նա տվել է խոստովանական բացատրություն, որ փետրվարի 17-ին, տեխնիկական միջոցների գործադրմամբ շարժիչի կափարիչը բացելով, գողացել է Շիրակի փողոցի շենքերից մեկի մոտ կայանված «ՎԱԶ-2106» մակնիշի մեքենայի մարտկոցը: Նա նաև հայտնել է, որ փետրվար և մարտ ամիսներին Շենգավիթի վարչական տարածքում կայանված այլ մեքենաներից ևս կատարել է մարտկոցների գողություններ և գողության փորձեր:
Ձեռնարկված օպերատիվ-հետախուզական միջոցառումների շնորհիվ պարզվել է, որ նա 2019 թ. նոյեմբերի վերջին, տեխնիկական միջոցների գործադրմամբ շարժիչի կափարիչը բացելով, փորձել է գողանալ Արարատյան փողոցի տներից մեկի մոտ կայանված «ԳԱԶել-3302» մակնիշի մեքենայի մարտկոցը, սակայն հանցագործությունն ավարտին չի հասցրել:
Մեքենայատիրոջից ընդունվել է հաղորդում:
Ձեռնարկվում են միջոցառումներ տուժող անձանց և գողոնը հայտնաբերելու ուղղությամբ:
Նախապատրաստվում են նյութեր: