Գողություններ կատարած տղամարդը ձերբակալվել է. Արմավիրի ոստիկանների բացահայտումը

Ոստիկանության Արմավիրի մարզային վարչության քրեական հետախույզները ստացել էին օպերատիվ տեղեկություն, որ նախկինում տարբեր, այդ թվում` ծանր հանցագործությունների համար դատապարտված և այժմ բնակության մշտական վայր չունեցող 48-ամյա մի տղամարդ, որը հաշվառված է Արագածոտնի մարզի Ուշի գյուղում, վերջին օրերին շրջում է Արմավիրի մարզի տարբեր համայնքներում և թիրախավորելով հատկապես տարեց մարդկանց` նրանց բնակարաններից կատարում է գողություններ:
Օպերատիվ տեղեկությունները ճշտելիս պարզվեց, որ նման մի ահազանգ ստացվել է ոստիկանության Մեծամորի բաժնում: Ըստ հաղորդման` հուլիսի 12-ին, ժամը 17.20-ից 17.30-ն ընկած ժամանակահատվածում, օգտվելով տարեց տանտերերի կարճատև բացակայությունից, անհայտ անձը մտել էր տուն և տարել 75-ամյա ամուսնու գրպանի փողը և 73-ամյա կնոջ դրամապանակը, որում կային ոսկյա ականջօղեր, փող ու նույնականացման քարտ:
Հետագա միջոցառումներով ձեռք բերվեցին տվյալներ, որ այդ գողությունն էլ 48-ամյա տղամարդու գործն է:
Մարզային վարչության և Մեծամորի բաժնի ծառայողների համատեղ միջոցառումն արդյունք տվեց հուլիսի 15-ին: Էջմիածնի Կոմիտասի հրապարակում 48-ամյա տղամարդը հայտնաբերվեց, գողություն կատարելու կասկածանքով ձերբակալվեց ու տեղափոխվեց ոստիկանության Մեծամորի բաժին:
Կազմված փաստաթղթերն ու տղամարդը ներկայացվեցին քննչական մարմին: Տղամարդը ձերբակալվեց ու տեղափոխվեց ձերբակալվածների պահման վայր:
Հուլիսի 18-ին, դատարանի որոշմամբ, նա կալանավորվել ու տեղափոխվել է քրեակատարողական հիմնարկ:
Ձեռնարկվում են միջոցառումներ՝ 48-ամյա տղամարդու հանցավոր այլ արարքներից տուժած անձանց և տարբեր գործերով գողոնը հայտնաբերելու ուղղությամբ: