Հանդիպում ՀՀ ոստիկանությունում. քննարկվեցին քաղաքացիների իրավունքներն ու արժանապատվությունը պաշտպանելու ուղղությամբ տարվող աշխատանքներին առնչվող հարցեր (ՏԵՍԱՆՅՈՒԹ)

Մարտի 6-ին ՀՀ ոստիկանության շտաբի պետ, ոստիկանության գնդապետ Հովհաննես Քոչարյանն ընդունեց արդարադատության ոլորտի բարեփոխումների նախագծման և պայմանների սահմանման նպատակով Հայաստանում գտնվող Եվրոպական Միության պատվիրակությանը՝ Դանիայի մարդու իրավունքների պաշտպանի գրասենյակի միջազգային համագործակցության ստորաբաժանման տնօրեն Կլավս Հեդի և Իսպանիայի Ներքին գործերի նախարարության քաղաքացիական գվարդիայի վարչության պետ Անսելմո Դել Մորալ Տորեսի ղեկավարությամբ:
Հանդիպմանը մասնակցում էին նաև ՀՀ արդարադատության նախարարության, ՀՀ Քննչական կոմիտեի, ՀՀ Հատուկ քննչական ծառայության, ՀՀ Մարդու իրավունքների պաշտպանի գրասենյակի և ՀՀ ոստիկանության ներկայացուցիչներ:
Հովհաննես Քոչարյանը համառոտակի անդրադարձ կատարեց խոշտանգումների, և այլ դաժան, անմարդկային կամ արժանապատվությունը նվաստացնող վերաբերմունքի կանխարգելման և դրա դեմ տարվող պայքարի պրակտիկային, այդ ոլորտին առնչվող օրենսդրությանը, ՀՀ ոստիկանության գործառույթներին և իրականացվող բարեփոխումների շրջանակում մինչ այժմ կատարված միջոցառումներին, որոնք միտված են ձերբակալվածների իրավունքների պաշտպանությունն ավելի արդյունավետ դարձնելուն, նրանց իրազեկվածությունը բարձրացնելուն, ձերբակալվածների պահման վայրերում պայմանների բարելավմանը:
Ներկայացվեց նաև ՀՀ Մարդու իրավունքների պաշտպանի գրասենյակի և հասարակական դիտորդական խմբի հետ իրականացվող շարունակական համագործակցությանը:
Հովհաննես Քոչարյանը հատկապես կարևորեց քաղաքացիների իրավունքներն ու արժանապատվությունը պաշտպանելու ուղղությամբ տարվող աշխատանքները՝ նշելով, որ նման յուրաքանչյուր դեպք գտնվում է ՀՀ ոստիկանության ղեկավարության անմիջական հսկողության ներքո և ստանում է համարժեք իրավական գնահատական:
Հանդիպման ընթացքում հյուրերի կողմից ներկայացվեցին մի շարք հարցեր, որոնց տրվեցին ամփոփ ու սպառիչ պատասխաններ: