Զենք-զինամթերքի կամավոր հանձնումներ ՆԳՆ ենթակա ծառայությունների տարածքային բաժիններում

ՆԳ նախարարության ենթակա ծառայությունների տարածքային ստորաբաժանումների ծառայողները ամենօրյա ակտիվ բացատրական աշխատանք են կատարում ապօրինի պահվող զենք-զինամթերքի կամավոր հանձնման ուղղությամբ։
Մասնավորապես, Սյունիքի մարզային փրկարարական վարչության ծառայողների բացատրական աշխատանքի շնորհիվ վաչություն ներկայացած տղամարդը կամավոր հանձնել է ինքնաշեն ակոսափող հրազեն, «Ֆ-1» տիպի նռնակ՝ պայթուցիչով և ռազմամթերք։
Արդյունավետ է եղել նաև ոստիկանության Գորիսի բաժնի համայնքային ոստիկանների բացատրական աշխատանքը. արձանագրվել է «ԱԿՄ» տեսակի ինքնաձիգի, 2 «Ֆ-1» և 1 «ՌԳԴ-5» տեսակի նռնակների ու ռազմամթերքի կամավոր հանձնման դեպք։
Ակոսափող հրազենի կամավոր հանձնում է եղել նաև ոստիկանության Չարենցավանի բաժնում։
Վաղարշապատի բաժնի ոստիկանների հետևողական աշխատանքի շնորհիվ հոկտեմբերի 22-ի ցերեկը Ինքնաթիռի թևեր կոչվող հուշարձանի մոտ մի քաղաքացի թողել էր նռնականետ, նռնականետի մարտական գլխիկներ, տարբեր տրամաչափի 5426 փամփուշտ, որսորդական ողորկափող հրացան, նռնակի 51 պայթուցիչ, առանց պայթուցիչի՝ 3 և պայթուցիչով՝ 1 նռնակ ու ռազմամթերք։
Հորդորում ենք ապօրինի զենք-զինամթերքը կամավոր հանձնել ոստիկանություն՝ քրեական պատասխանատվությունից խուսափելու համար։