Կապանի ոստիկանները բնակարանային գողության դեպք են բացահայտել

Մարտի 3-ին Կապան քաղաքի Վահանավանք թաղամասի տներից մեկից գողություն էին արել։ Ահազանգով դեպքի վայր հասած օպերատիվ-քննչական խմբերն արձանագրեցին, որ կոտրել են բնակարանի մուտքի դռան փականն ու կենցաղային իրեր հափշտակել։ Հարուցվեց քրեական գործ, որի շրջանակներում Կապանի քրեական հետախույզները, համագործակցելով մարզային վարչության և տարածքային քննչական բաժնի ծառայողների հետ, ձեռնարկեցին տարաբնույթ օպերատիվ միջոցառումներ։ Ամիսներ տևած հետևողական աշխատանքի արդյունքում բնակարանային գողությունը օրերս բացահայտվեց։ Կապանի ոստիկանների տեսադաշտում հայտնված 21-ամյա երիտասարդը հայտնաբերվեց ու բերման ենթարկվեց բաժին, ապա ներկայացվեց դեպքի նախաքննությունը վարող մարմնին։ Նա կալանավորված է։ Հետագա միջոցառումներով իրավապահները հայտնաբերեցին նաև գողոնի մի մասը։ Հարուցված քրեական գործի նախաքննությունը շարունակվում է։