Կենտրոնականի քրեական հետախույզները մեքենաներից կատարված գողության դեպքեր են բացահայտել

Ապրիլի 6-ին, ժամը 17-ի սահմաններում, ոստիկանության Կենտրոնական բաժնում օպերատիվ կառավարման կենտրոնից հաղորդում էր ստացվել, որ ապրիլի 5-ից 6-ն ընկած ժամանակահատվածում գողացել են Բյուզանդի փողոցի տներից մեկի մոտ կայանված «ԲՄՎ» մակնիշի մեքենայի կողային հայելիները:
Հետաքննություն իրականացնող մարմինը գողությունը կատարած անձին և գողոնը հայտնաբերելու ուղղությամբ անհրաժեշտ միջոցառումներ ձեռնարկեց, որոնց արդյունքում տեղեկություններ ստացվեցին, որ գաղտնի հափշտակությունը հնարավոր է կատարած լինի Զավարյան փողոցի 17-ամյա մի բնակիչ:
Ձեռք բերված տեղեկությունների իսկությունը ստուգելուց հետո ապրիլի 20-ին, ժամը 16.30-ի սահմաններում, Վարդավառի լճի մոտից կասկածվողը բերման ենթարկվեց ոստիկանության Կենտրոնական բաժին:
Նյութերի նախապատրաստման ընթացքում պարզվեց, որ նշված գողությունից զատ բերման ենթարկվածն ապրիլի լույս 20-ի գիշերը գողացել էր նաև Զավարյան փողոցի շենքերից մեկի մոտ կայանված «Մերսեդես» մակնիշի մեքենայի կողային հայելիները:
Հանգամանքները պարզվում են:
Ձեռնարկվում են միջոցառումներ՝ գողոնը հայտնաբերելու ուղղությամբ:
Գողությունների փաստով նախապատրաստվում են նյութեր: