Ոստիկանները բացահայտել են բազմադրվագ գողություններ խանութներից

Հուլիսի 9-ին, ժամը 15.30-ին, Կենտրոնականի քրեական հետախույզները, իրացնելով ստացված օպերատիվ տվյալները, գողություն կատարելու կասկածանքով, Խանջյան փողոցից բերման են ենթարկել մայրաքաղաքի Շահումյան 6-րդ փողոցի բնակիչ, 29-ամյա տղամարդու: Նա հայտնել է, որ վերջին մեկ ամսվա ընթացքում Կենտրոն վարչական շրջանի տարբեր վայրերից կատարել է գողություններ:
Մասնավորապես, Թումանյան փողոցում գործող սուպերմարկետում, օգտվելով աշխատակիցների անուշադրությունից, գողացել է երեք շիշ օղի: Դարձյալ օգտվելով աշխատակիցների անուշադրությունից՝ Հյուսիսային պողոտայում գտնվող մեկ այլ սուպերմակետից գողացել է մեկ շիշ թանկարժեք ալկոհոլային ըմպելիք, Մաշտոցի պողոտայի մի դեղատնից՝ երկու տուփ ոսպնյակներ, իսկ նույն պողոտայի մի խանութից՝ սափրվելու սարք:
Ձեռնարկվում են միջոցառումներ բոլոր դեպքերով գողոնը հայտնաբերելու ուղղությամբ:
Նախապատրաստվում են նյութեր: