Կումայրիի ոստիկաններն անձնական ունեցվածքի գողության դեպք են բացահայտել

Հունվարի 30-ին, ժամը 17-ի սահմաններում, ոստիկանության Կումայրիի բաժնում մի կին հաղորդում էր տվել, որ ժամեր առաջ Գյումրիի Շահումյան փողոցի հագուստի խանութում գրպանից գողացել են բջջային հեռախոսը` պատճառելով մոտ 100.000 դրամի վնաս:
Օպերատիվ խումբը որոնողական աշխատանք սկսեց: Քրեական հետախույզների մասնագիտական հմտության շնորհիվ տեղեկություններ ստացվեցին, որ գողությունը հնարավոր է կատարած լինի Արամ Խաչատրյան փողոցի 46-ամյա մի բնակիչ:
Փետրվարի 5-ին Գյումրիի Անկախության հրապարակից կասկածվողը, իր «Մերսեդես» մակնիշի մեքենայով հանդերձ, բերման ենթարկվեց ոստիկանության Կումայրիի բաժին։
Նա տվել է խոստովանական բացատրություն։
Բջջային հեռախոսը հայտնաբերվել է:
Փաստի առթիվ նախապատրաստվում են նյութեր։