Ի ԼՐՈՒՄՆ. «Վիճաբանություն՝ ողբերգական հանգուցալուծմամբ»

Ինչպես տեղեկացրել էինք՝ մայիսի 15-ին, ժամը 23.15-ին, հիվանդանոցից ոստիկանության Եղեգնաձորի բաժնում հաղորդում էր ստացվել, որ բուժօգնության են դիմել 1991 թ. ծնված Սուրիկ Հ.-ն` «որովայնի թափանցող վերք, ստամոքսի վնասվածք» ախտորոշմամբ, 1994 թ. ծնված Լյուդվիգ Գ.-ն` «կրծքավանդակի աջ կեսի չթափանցող կույր վերք» ախտորոշմամբ և «կրծքավանդակի ձախ հատվածի թափանցող վերք» ախտորոշմամբ` 1992 թ. ծնված Սամվել Հովակիմյանը, ով հիվանդանոցում, գիտակցության չգալով, մահացել էր:
Նույն օրը ոստիկանություն հաղորդում էր ստացվել, որ ժամը 23:55-ին «որովայնի շրջանում դանակահարված վերք» ախտորոշմամբ հիվանդանոց է դիմել 1991 թ. ծնված Էդգար Բ.-ն, այնուհետև հաղորդում էր ստացվել, որ մայիսի 16-ին, ժամը 01.30-ին «գլխի պատռված, նստատեղի ծակած կտրած վերքեր» ախտորոշմամբ բուժօգնության է դիմել նաև 1986 թ. ծնված Արթուր Բ.-ն:
Պարզվել էր, որ Էդգար Բ.-ն և Արթուր Բ.-ն մարմնական վնասվածքները ստացել են մայիսի 15-ին, ժամը 23-ի սահմաններում, Եղեգնաձոր քաղաքի Երևանյան խճուղու ճամփեզրին գտնվող նախկին ավտոկայանի տարածքում, վիճաբանության ժամանակ, որին մասնակից են եղել նաև Սուրիկ Հ.-ն, Լյուդվիգ Գ.-ն, 1971 թ. ծնված Հովիկ Հ.-ն և Սամվել Հովակիմյանը:
Հովիկ Հ.-ն ստացել էր աջ ազդրի կտրած վերք, սակայն հիվանդանոց չէր դիմել:

Մայիսի 16-ին, ժամը 16.15-ին, հիվանդանոցից ոստիկանության Եղեգնաձորի բաժնում հաղորդում է ստացվել, որ «ձախ ուսագոտու ծակած-կտրած վերք» ախտորոշմամբ բուժօգնության է դիմել 1991 թ. ծնված Հայկ Ա.-ն:
Ձեռնարկված միջոցառումների շնորհիվ պարզվել է, որ նա վնասվածքը ստացել է մայիսի 15-ին, ժամը 23-ի սահմաններում, Եղեգնաձոր քաղաքի Երևանյան խճուղու ճամփեզրին գտնվող նախկին ավտոկայանի տարածքում տեղի ունեցած վիճաբանության ժամանակ:
Նախաքննությունը շարունակվում է: