Մալաթիայի ոստիկաններն առանձնապես խոշոր չափի մեթամֆետամին են հայտնաբերել. մեկ անձ ձերբակալվել է

Դեկտեմբերի 26-ին ոստիկանության Մալաթիայի բաժնի քրեական հետախույզները, իրացնելով ստացված օպերատիվ տվյալները, Երևանի Օհանովի փողոցից թմրամիջոց պահելու և իրացնելու կասկածանքով, մեքենայով հանդերձ, բաժին բերման ենթարկեցին նույն փողոցի 37-ամյա մի բնակչի։
Անձնական խուզարկությամբ բերման ենթարկվածի մոտից հայտնաբերվեց մոխրացած հետքերով կաթուցիչ, իսկ մեքենայից նա ներկայացրեց 41 գրամից ավելի մեթամֆետամինի նմանվող բյուրեղանման զանգվածներ, ինչպես և մարիխուանայի նմանվող զանգված։
Ըստ նրա՝ հայտնաբերված զանգվածները տարբեր տեսակի թմրամիջոցներ են, որոնք պահել էր իրացման նպատակով:
Փաստի առթիվ հարուցվել է քրեական գործ:
Նշանակվել են փորձաքննություններ:
Բերման ենթարկվածը ձերբակալվել է:
Հանգամանքները քննությամբ պարզվում են։