Հայտնաբերվել են «Մակարով», փամփուշտներ ու ներարկիչներ. Արագածոտնի պարեկների բացահայտումը

Հուլիսի 6-ին, ժամը 4.50-ին, Մարգարա-Վանաձոր-Տաշիր ճանապարհի 49-րդ կմ-ին Արագածոտնի պարեկները կանգնեցրել են Աբովյան քաղաքի բնակիչ 42-ամյա մի տղամարդու վարած «ՎԱԶ-2109» մակնիշի մեքենան: Ստուգման ժամանակ պարեկները նկատել են, որ ուղևորը գրպանից նետում է շագանակագույն հեղուկով լցված երկու ներարկիչ։ Վարորդն ու ուղևորը, թմրամիջոց պահելու և օգտագործելու կասկածանքով, ձերբակալվում և տեղափոխում են ոստիկանության Աշտարակի բաժին, որտեղ պարզվում է ուղևորի ինքնությունը` Վանաձոր քաղաքի բնակիչ 44-ամյա տղամարդ:
Անձնական խուզարկությամբ նրանց մոտ արգելված ոչինչ չի հայտնաբերվել: Ներարկիչների վերաբերյալ վարորդը հայտնել է, որ դրանցում խթանիչ է, պատկանում են իրեն, բացի այդ` մեքենայի սրահում ունի ատրճանակ, որը գտել է Երևանի Դավիթաշեն թաղամասում: Վարորդը, ուղևորը և կազմված փաստաթղթերը ներկայացվել են Արագածոտնի մարզային քննչական վարչություն, որտեղ նախաձեռնվել է քրեական վարույթ: Երկուսն էլ ձերբակալվել և տեղափոխվել են ձերբակալվածների պահման վայր: Վարույթի շրջանակում կատարված խուզարկությամբ «ՎԱԶ-2109»-ի սրահում հայտնաբերվել են թղթե տոպրակ, որում կար «Մակարով» տիպի ատրճանակ՝ լիցքավորված 5 փամփուշտով, առանձին փամփշտատուփ` յոթ փամփուշտով, նաև չօգտագործած վեց ներարկիչ:
Նախաքննությամբ հանգամանքները պարզվում են: