Մալաթիայի ոստիկանները բնակարանային գողության դեպք են բացահայտել

Տիչինայի փողոցի մի տնից գողություն էին արել։ Բնակարանային գողության մասին ոստիկանության Մալաթիայի բաժնի ծառայողները տեղեկացան դեկտեմբերի 7-ի ժամը 1.30-ի սահմաններում՝ օպերատիվ կառավարման կենտրոնից։ Տանտերը տուն մտնելուն պես 1-02 էր զանգել։
Տիչինայի փողոց մեկնած քրեական հետախույզները զրուցեցին տուժողի հետ։ Դեկտեմբերի 6-ից 7-ը տեխնիկական միջոցների գործադրմամբ բացել էին պատուհանը, մտել ներս ու գողացել ոսկյա զարդեր։
Դեպքի առթիվ հարուցվեց քրեական գործ։ Բացահայտման ուղղությամբ հետախուզական միջոցառումներ սկսվեցին։ Մալաթիայի ոստիկանները տեղեկություններ ստացան, որ բնակարանային գողությունը հնարավոր է կատարած լինի Շահումյան 16-րդ փողոցի 25-ամյա մի բնակիչ։ Դեկտեմբերի 15-ին նա հայտնաբերվեց Երևանի Ռոմանոս Մելիքյան փողոցում ու բերման ենթարկվեց ոստիկանության Մալաթիայի բաժին։
Երիտասարդը ներկայացվել է նախաքննական մարմնին, տվել խոստովանական ցուցմունք և ձերբակալվել:
Գողոնը մասամբ հայտնաբերվել է:
Հարուցված քրեական գործի նախաքննությունը շարունակվում է: