ՄԱԿ-ի մանկական հիմնադրամի հայաստանյան գրասենյակի պատվիրակությունը ՀՀ ոստիկանությունում

Սեպտեմբերի 16-ին ոստիկանության քրեական հետախուզության գլխավոր վարչության 3-րդ վարչության պետ, ոստիկանության գնդապետ Նելլի Դուրյանն ընդունեց ՄԱԿ-ի մանկական հիմնադրամի հայաստանյան գրասենյակի պատվիրակությանը՝ խորհրդատու Դեն Օ՝Դոնելի գլխավորությամբ:
Հանդիպմանը մասնակցում էին նաև ոստիկանության շտաբի և ինֆորմացիոն կենտրոնի ծառայողներ:
Ողջունելով հյուրերին՝ Նելլի Դուրյանը բարձր գնահատեց ՄԱԿ-ի մանկական հիմնադրամի հայաստանյան գրասենյակի հետ տարիների ընթացքում ձևավորված համագործակցությունն ու հույս հայտնեց, որ գործընկերային հարաբերությունները կշարունակեն զարգանալ և ամրապնդվել:
Այնուհետև հյուրերին ներկայացվեց ոստիկանությունում իրականացվող աշխատանքները՝ անչափահասների կողմից կատարվող իրավախախտումների ու հանցագործությունների արդյունավետ կանխարգելման, նրանց իրավագիտակցությունը բարձրացնելու եւ իրավունքները պաշտպանելու ուղղությամբ: Ներկայացվեց նաև ոստիկանությունում վիճակագրության վարման գործընթացը:
Շնորհակալություն հայտնելով ընդունելության համար՝ Դեն Օ՝Դոնելն իր հերթին ներկայացրեց անչափահասների կողմից և նրանց նկատմամբ կատարված հանցագործությունների հաշվառման միջազգային չափորոշիչները, որոնք կարող են նպաստել վիճակագրության վարման և վերլուծության գործընթացի արդյունավետության բարձրացմանը:
Կողմերը պայմանավորվածություն ձեռք բերեցին շարունակել աշխատանքները` առկա ակտիվ համագործակցության միջոցով լավագույն արդյունքներ ստանալու նպատակով: