Մուշի ոստիկանները բնակարանային գողության դեպքեր են բացահայտել ու հայտնաբերել գողոնը

Մայիսի 28-ին, կեսգիշերն անց, ոստիկանության Մուշի բաժնում Գյումրիի Սավոյան փողոցի մի բնակչուհի հաղորդում էր տվել, որ նախորդ օրը, օգտվելով տնից իրենց բացակայելու հանգամանքից, տեխնիկական միջոցների գործադրմամբ կոտրել են տնակի մուտքի դռան փականը և գողացել հեռուստացույց ու համակարգիչ:
Օպերատիվ խումբը մեկնել էր Սավոյան փողոց: Իրավապահներն ուսումնասիրել էին դեպքի վայրը, կազմել արձանագրություններ: Քրեական հետախույզները գողությունը կատարած անձին հայտնաբերելու ուղղությամբ միջոցառումներ էին ձեռնարկում, երբ հունիսի 1-ին բնակարանային գողության վերաբերյալ նոր ահազանգ ստացվեց. դարձյալ օգտվելով տանտերերի բացակայությունից` կոտրել էին Շարա Տալյան փողոցի տներից մեկի դուռը և գողացել հեռուստացույց:
Ձեռագիրը նույնն էր: Մշակվեց օպերատիվ պլան: Առաջ քաշվեցին և ստուգվեցին տարբեր վարկածներ: Բացահայտման աշխատանքներին միացան նաև ոստիկանության Կումայրիի բաժնի ծառայողները, և փոխգործակցությունն օրեր անց դրական արդյունք տվեց:
Իրավապահները տեղեկություններ ստացան, որ բնակարանային գողությունները հնարավոր է կատարած լինի նախկինում տարբեր հանցագործությունների համար դատապարտված Սավոյան փողոցի 36-ամյա մի բնակիչ:
Հունիսի 3-ին, ժամը 12.30-ի սահմաններում, կասկածվողը բերման ենթարկվեց ոստիկանության Մուշի բաժին:
Նա տվել է խոստովանական բացատրություն:
Հանգամանքները պարզվում են:
Գողոնը հայտնաբերվել է:
Կատարվում է նախաքննություն: