Բերման ենթարկված տղամարդը խոստովանել է նաև այլ գողություններ

Մարտի 11-ին, ժամը 20.00-ին, ոստիկանության Նոր Նորքի բաժնի ՔՀԲ ծառայողները, գողություն կատարելու կասկածանքով, Գայի պողոտայից բերման են ենթարկել 34-ամյա տղամարդու: Նա տվել է խոստովանական բացատրություն, որ օրեր առաջ Նոր Նորքի 2-րդ զանգվածում, օգտվելով բեռնախցիկը բաց լինելու հանգամանքից, գողացել է «Մերսեդես» մակնիշի մեքենայի գազի բալոնը:
Ձեռնարկված միջոցառումների շնորհիվ պարզվել է, որ նա, օգտվելով բեռնախցիկը բաց լինելու հանգամանքից, գողացել է նաև Նոր Նորքի 5-րդ զանգվածում կայանված «Մերսեդեսի» գազի բալոնը:
Նյութերի նախապատրաստման ընթացքում պարզվել է, որ մարտի 10-ին Լյուքսեմբուրգի փողոցի 2-րդ նրբանցքում կայանված «ՎԱԶ-21104» մակնիշի մեքենայի գազի բալոնը, գործիքները և Վիլնյուսի փողոցի շենքերից մեկի բակում կայանված «Օպելի» գազի բալոնը ևս նա էր գողացել:
34-ամյա տղամարդը բոլոր դեպքերով խոստովանական ցուցմունք է տվել:
Ձեռնարկվում են միջոցառումներ՝ գողոնը հայտնաբերելու ուղղությամբ:
Կատարվում է քննություն: