Կոտայքի պարեկների պայքարը թմրամոլության դեմ

Սեպտեմբերի 13-ին, երեկոյան ժամը 6-ին, Աբովյան քաղաքի Երիտասարդական փողոցում ծառայող Կոտայքի պարեկները վարորդական իրավունքի վկայական չունենալու և լուսաթափանցելիության խախտմամբ ապակիներով երթևեկելու համար կանգնեցրել են «ՎԱԶ» մակնիշի մի մեքենա: Ստուգման ընթացքում, սակայն, պարեկների կասկածն է հարուցել նաև ուղևորի վարքը: Թմրանյութ ապօրինի պահելու և օգտագործելու կասկածանքով Նոր Հաճնի բնակիչ 31-ամյա ուղևորը տեղափոխվել է ոստիկանության Կոտայքի բաժին: Այստեղ նրա անձնական խուզարկությամբ հայտնաբերվել են շագանակագույն և կանաչ զանգվածներով երկու փաթեթ ու մեկ կաթուցիչ: Նա հայտնել է, թե շագանակագույն զանգվածն ու կաթուցիչում եղած «շոկո» տեսակի թմրանյութը գնել է «Տելեգրամ» հավելվածի միջոցով, իսկ մարիխուանան ինքն է պատրաստել` իր քաղած կանեփից: Երիտասարդը նաև հավելել է, որ այդ ամենն իր օգտագործման համար էր:
Կազմված փաստաթղթերն ուղարկվել են Աբովյանի քննչական բաժին:
Սեպտեմբերի 17-ին Երևան-Սևան ճանապարհի 13-րդ կմ-ին ծառայություն իրականացնող Կոտայքի պարեկները ստուգման նպատակով կանգնեցրել են «Ռենո» մակնիշի մի մեքենա: Ուղևորի կոշիկի մեջ նկատելով կաթուցիչ` պարեկները նրան և վարորդին թմրամիջոց ապօրինի պահելու և օգտագործելու կասկածանքով ձերբակալել ու տեղափոխել են ոստիկանության Կոտայքի բաժին: Անձնական խուզարկությամբ չարենցավանցի 21-ամյա ուղևորի կոշիկի մեջ հայտնաբերվել է մոխրացած հետքերով կաթուցիչ, իսկ երևանցի 63-ամյա վարորդը մեքենայի սրահից ներկայացրել է դեղնականաչավուն զանգվածով փաթեթ: Երիտասարդը հայտնել է, որ իրենն է նաև փաթեթի մեջ եղած մարիխուանան, որն իր համար պատրաստել է անձամբ:
Այս դեպքով ևս կազմված փաստաթղթերն ուղարկվել են Աբովյանի քննչական բաժին: