Արմավիրի ոստիկանները պայքարում են թմրամոլության դեմ

Արմավիրի քրեական հետախույզներն օպերատիվ տեղեկություններ էին ստացել, որ Լուկաշին գյուղի բնակիչ, 59-ամյա մի տղամարդ իր տնամերձ հողամասում ցանել է մշակումն արգելված, թմրանյութ պարունակող բույսեր:
Հուլիսի 25-ին, ժամը 14.50-ին, զննություն է կատարվել նրա հողամասում և տան բակում: Հողամասից հայտնաբերվել է 30 թուփ, որոնց վերաբերյալ տանտերը հայտարարել է, որ կանեփի բույսեր են, ինքն է աճեցրել՝ իր օգտագործման համար:
Նա նաև կամավոր ներկայացրել է պոլիէթիլենային փաթեթ, որի մեջ եղել է 7,20 գրամ դեղնականաչավուն, չորացված-մանրացված զանգված: Ըստ նրա՝ այն կանեփից պատրաստված թմրամիջոց է, որը նույնպես պատրաստել է իր համար:
Նույն բաժնի ծառայողները նմանատիպ տեղեկություններ են ստացել նաև Փշատավան գյուղի 56-ամյա մի բնակչի մասին:
Նույն օրը զննություն է կատարվել նաև նրա տնամերձ հողամասում և բակում: Հայտնաբերվել են կանեփի բույսին նմանվող վեց թուփ, չորացված ճյուղ, ինչպես նաև տարայի մեջ լցված դեղնականաչավուն, չորացված-մանրացված զանգված:
Տանտերը հայտարարել է, որ հայտնաբերվածը կանեփի բույսեր են, ինքն է աճեցրել՝ իր համար:
Երկու դեպքով էլ նշանակվել է դատատոքսիկաքիմիական փորձաքննություն և նախապատրաստվում են նյութեր: