Վաղարշապատի ոստիկանները բացահայտեցին գողության փորձը

Հունիսի 3-ին, գիշերվա ժամը երկուսին մոտ, ոստիկանության Արմավիրի մարզի օպերատիվ կառավարման կենտրոն ստացվել է ահազանգ: Արշալույս գյուղի բնակիչ կինը հայտնում էր, որ իր տան մոտ աթոռ է դրված, որի միջոցով փորձել են մտնել իր տուն: Կինը նաև հայտնեց, որ գողության փորձ կատարողը դեռ իրենց տան մոտակայքում է:
Հաղորդումը փոխանցվեց ոստիկանության Վաղարշապատի բաժին, որտեղից էլ օպերատիվ խումբը շտապ մեկնեց Արշալույս: Տանտերն իրավապահներին հայտնեց, որ պատուհանը բաց է եղել, մի տղամարդ փորձել է մտնել պատուհանից, սակայն իրեն նկատել ու դիմել է փախուստի:
Բաժնի համայնքային ոստիկանների և հերթապահ մասի ծառայողների արագ գործողությունների արդյունքում ճշտվել է կատարողի ինքնությունը: Ահազանգից մեկ ժամ անց, գողության փորձ կատարելու կասկածանքով, Արշալույս գյուղի իր տանը ձերբակալվել և ոստիկանության Վաղարշապատի բաժին է տեղափոխվել 21-ամյա մի երիտասարդ:
Կազմված փաստաթղթերն ու երիտասարդը ներկայացվել են Վաղարշապատի քննչական բաժին: Հանգամանքները պարզվում են: