Skype-ի միջոցով հերթական ուղիղ կապի ընթացքում արտերկրի մեր հայրենակիցների հարցերին տրվեցին սպառիչ պատասխաններ (ՏԵՍԱՆՅՈՒԹ)

Նոյեմբերի 11-ին ոստիկանության անձնագրային եւ վիզաների վարչության կազմակերպական-հսկողական բաժնի պետ, ոստիկանության փոխգնդապետ Մնացական Բիչախչյանը սկայպի միջոցով հերթական անգամ պատասխանեց արտերկրի մեր հայրենակիցների հարցերին:
Մոսկվայում գտնվող ՀՀ քաղաքացին ցանկանում էր տեղեկանալ՝ լիազորված անձի միջոցով կարո՞ղ է դիմել նոր անձնագիր ստանալու համար: Նրան պարզաբանվեց, որ նոր անձնագիր ստանալու համար քաղաքացին պետք է անձամբ դիմի:
Զանգահարած մեր մյուս հայրենակցին հետաքրքրում էր, թե Հայաստանում բնակվող Ռուսաստանի Դաշնության քաղաքացին, ով նաեւ Հայաստանի Հանրապետության քաղաքացիություն է ստացել, ինչպես պետք է այդ մասին տեղեկացնի Ռուսաստանի իրավասու մարմիններին: Նրան պարզաբանվեց գործող կարգը:
Հայաստանում իր բնակությունն օրինական հիմքով կազմակերպելու եւ ձեւակերպելու իրավական հնարավորությունների մասին էր ցանկանում տեղեկանալ զանգահարած օտարերկրյա քաղաքացին՝ Ավստրիայից: Նրան պարզաբանվեց գործող կարգն ու անհրաժեշտ փաստաթղթերի ցանկը:
Մեր մյուս հայրենակցի հարցը թեեւ չէր առնչվում ոստիկանությանը, այնուամենայնիվ, տրվեց սպառիչ պատասխան: Զանգահարող քաղաքացուն պարզաբանեց, որ այլ պետության քաղաքացիություն ընդունած Հայաստանի քաղաքացին չի ազատվում պարտադիր զինվորական ծառայությունից՝ անկախ այլ պետությունում ծառայելու հանգամանքից:
Սկայպի միջոցով հաջորդ ուղիղ կապը տեղի կունենա նոյեմբերի 18-ին՝ Երեւանի ժամանակով ժամը 10-ից 12-ը:

ՀՀ ոստիկանության սկայպի հասցեն` Armenian Police

Հարցեր կարելի է ուղարկել նաև press@police.am, qartugharutyun@police.am էլեկտրոնային հասցեներին: