Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)
![Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ) Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)](/timthumb?src=/resources/police/img/news/big/1434462926,963.jpeg&q=75&w=780&wm=1)
Հունիսի 16-ին մեր հայրենակիցները հերթական անգամ Skype-ի միջոցով իրենց հետաքրքրող հարցերն ուղղեցին ոստիկանության անձնագրային և վիզաների վարչության պետի տեղակալ, ոստիկանության փոխգնդապետ Մնացական Բիչախչյանին:
Հայաստանից զանգահարած քաղաքացին տեղեկացրել է, որ ծնվել է 1981 թվականին, սակայն ինչ-ինչ պատճառներով ծնունդը չի գրանցվել և մեկ տարի առաջ է միայն դատական ճանապարհով ստացել ծննդյան վկայական: Քաղաքացուն հետաքրքրում էր՝ քանի որ 16 տարին լրանալու կապակցությամբ անձնագիր չի ստացել, կարո՞ղ է այն ստանալ հիմա: Նրան պարզաբանվել է, որ եթե անձը օրենքի ուժով համարվում է Հայաստանի քաղաքացի, ապա անկախ այն հանգամանքից 16 տարին լրանալու կապակցությամբ անձնագիր ստացել է, թե՝ ոչ, ցանկացած պահի կարող է այն ստանալ՝ առանց որևէ պատասխանատվություն կրելու:
Հայաստանից զանգահարած մեկ այլ քաղաքացի էլ տեղեկացրել է, որ ազգականը Սիրիայի Արաբական Հանրապետության քաղաքացի է, 2012 թվականին ՀՀ Նախագահի հրամանագրով նրան շնորհվել է Հայաստանի քաղաքացիություն և ներկայումս գտնվում է Սիրիայում: Նա կարո՞ղ է անձնագիր ստանալու դիմումը ներկայացնել նշված պետությունում, առանց Հայաստան վերադառնալու: Քաղաքացուն պարզաբանվել է, որ Նախագահի հրամանագրով Հայաստանի քաղաքացիություն շնորհվելուց հետո առաջին անգամ անձնագիրը տրվում է Հայաստանում: Օրենսդրությամբ բացառություն է սահմանված միայն Լիբանանի Հանրապետության, Սիրիայի Արաբական Հանրապետության և Իրաքի Հանրապետության քաղաքացիների համար, ովքեր Հայաստանի քաղաքացիություն ստանալուց հետո կարող են առաջին անգամ անձնագիր ստանալ նշված պետությունների դիվանագիտական ծառայությունների միջոցով:
Հաջորդ ուղիղ կապը տեղի կունենա հունիսի 23-ին՝ Երեւանի ժամանակով ժամը 11-ից 13-ը:
ՀՀ ոստիկանության սկայպի հասցեն` Armenian Police
Հարցեր կարելի է ուղարկել նաև press@police.am, qartugharutyun@police.am էլեկտրոնային հասցեներին: